kremlin.ru sayti fotosurati
Rossiya va Qozog‘iston prezidentlari Vladimir Putin va Qosim-Jomart To‘qayev o‘z mamlakatlari munosabatlarini har tomonlama strategik sheriklik va ittifoq darajasiga o‘tkazish to‘g‘risida deklaratsiya imzoladilar. Imzolash marosimi ikki rahbar o‘rtasidagi muzokaralardan so‘ng Kremlda bo‘lib o‘tdi.
Qosim-Jomart To‘qayev deklaratsiya imzolanishini Moskvaga tashrifining asosiy maqsadlaridan biri deb atadi. Uning so‘zlariga ko‘ra, ushbu hujjat «ikki tomonlama munosabatlarda yangi davrni boshlab beradi, o‘zaro ishonchning misli ko‘rilmagan darajasini va birgalikda barcha sohalarda yaqindan ishlashga tayyorlikni tasdiqlaydi».
Kreml saytida chop etilgan hujjat to‘rt qismga bo‘lingan bo‘lib, ularning har biri hamkorlik sohalariga asoslangan: siyosat, xavfsizlik va iqtisodiyot, ilg‘or ilmiy va gumanitar sohalarda. Boshqa narsalar qatori, unda tomonlar «Birlashgan Millatlar Tashkiloti (BMT) Nizomida mustahkamlangan barcha maqsad va tamoyillarni o‘z ichiga olgan holda, xalqaro huquqqa hurmat asosida teng huquqli ko‘p qutbli dunyo tartibini yaratish maqsadlariga sodiq qolishlari» ta’kidlangan.
Deklaratsiyada shuningdek, Rossiya va Qozog‘iston Kollektiv Xavfsizlik Shartnomasi Tashkilotining (KXSHT) mintaqaviy barqarorlikni saqlashdagi asosiy rolini ko‘rishi va tashkilot salohiyatini yanada mustahkamlashga sodiqligi ta’kidlangan.
Hujjatda biologik va axborot xavfsizligi sohalarida hamkorlikni mustahkamlash haqida so‘z boradi. Ikkala mamlakat ham «fazoda qurol-yarog‘ joylashtirilishining oldini olish uchun birgalikdagi sa’y-harakatlarni davom ettiradilar».
Bundan tashqari, Qozog‘iston va Rossiya siyosiy bosimlar ta’sirida bo‘lmagan barqaror xalqaro transport yo‘laklarini rivojlantirish muhimligini yana bir bor tasdiqladi. Bu sohadagi hamkorlikning asosiy yo‘nalishlaridan biri «mintaqaviy aloqani mustahkamlash va yuk oqimlarini yanada samarali, ishonchli va xavfsiz ta’minot zanjirlari orqali diversifikatsiya qilish» imkonini beradigan yagona Yevrosiyo transport va logistika tizimini yaratishdir.
«Yevrosiyo Iqtisodiy Ittifoqining tobora ortib borayotgan xalqaro obro‘si»ni ta’kidlab, tomonlar mavjud kelishuvlarga muvofiq umumiy bozorlarni rivojlantirishda davom etadilar va milliy iqtisodiyotlarining raqobatbardoshligini oshirish muammolarini birgalikda hal qiladilar, deyiladi hujjatda.
Moskva va Ostona energetika sohasida — neft, gaz, ko‘mir va elektr energiyasi sohasidagi sheriklikni mustahkamlashda davom etadi. Ular, shuningdek, «xalqaro ishlab chiqarish va ta’minot zanjirlarini rivojlantirish asosida energiyaga o‘tish uchun zarur bo‘lgan muhim xomashyo sohasida amaliy hamkorlikni davom ettiradilar».
Alohida band migratsiyaga bag‘ishlangan: tomonlar ikki mamlakat fuqarolari bir-birining hududlarida yashash sharoitlarini yanada yaxshilashga sodiqliklarini yana bir bor tasdiqladilar. Rossiya va Qozog‘iston shuningdek, ta’lim va kadrlar tayyorlash sohasida yaqin hamkorlikni davom ettirishga qaror qildi.
Bundan tashqari, tomonlar davlatlar immunitetlari va ularning mulklari, jumladan, suveren rezervlar bo‘yicha xalqaro majburiyatlarga qat’iy rioya qilinishi zarurligini yana bir bor tasdiqladilar.
Qosim-Jomart To‘qayev 11-12 noyabr kunlari Rossiyaga davlat tashrifi bilan bordi (bu uning RFga birinchi davlat tashrifi). Birinchi kuni u Vladimir Putin bilan yopiq eshiklar ortida taxminan uch soat davom etgan norasmiy uchrashuv o‘tkazdi. Ikkinchi kuni u cheklangan va kengaytirilgan formatda muzokaralar olib bordi, shundan so‘ng ikkala rahbar qozog‘istonlik san’atkorlarning gala-konsertini tomosha qilish uchun Bolshoy teatriga tashrif buyurdilar.
