t.me/aqorda_resmi fotosurati
Qozog‘iston prezidenti Qosim-Jomart To‘qayev AQSH prezidenti Donald Trampning Ukrainadagi vaziyatni hal qilish borasidagi sa’y-harakatlarini qo‘llab-quvvatlashini bildirdi, deb xabar beradi Oqo‘rda matbuot xizmati. To‘qayev rasmiy tashrif bilan Ostonada bo‘lib turgan Armaniston Bosh vaziri Nikol Pashinyan bilan o‘tkazgan muzokaralardan so‘ng bu haqda bayonot berdi.
«Hozirgi murakkab geosiyosiy vaziyatda men AQSH prezidenti Donald Trampning Ukrainadagi vaziyatni hal qilish borasidagi sa’y-harakatlarini, shuningdek, u taqdim etgan rejani qo‘llab-quvvatlayman», — dedi qozoq yetakchisi. Shuningdek, u Ostona Armaniston va Ozarbayjon o‘rtasida tinchlik o‘rnatish istagini qo‘llab-quvvatlashini va «uni ilgari surishda har doim ishtirok etishga tayyor» ekanini yana bir bor ta’kidladi.
21 noyabr kuni Axios nashri 28 banddan iborat «Ukraina-Rossiya mojarosini hal qilish bo‘yicha Tramp rejasi»ni e’lon qildi. Nashrning Oq uydagi manbalariga ko‘ra, ushbu bandlar muhokama uchun Rossiya va Ukraina tomonlariga taqdim etilgan. Hujjatga ko‘ra, Ukraina, boshqa narsalar qatori, NATOga qo‘shilish istagidan voz kechadi, respublika qurolli kuchlari soni 600 ming kishigacha qisqartiriladi, saylovlar imzolanganidan so‘ng 100 kun o‘tib o‘tkazilishi kerak va Qrim, Lugansk va Donetsk Rossiya hududi sifatida tan olinadi. Rossiya, Ukraina va Yevropa o‘rtasida keng qamrovli tajovuz qilmaslik shartnomasi tuziladi va Kiyev xavfsizlik kafolatlarini oladi.
Reja shuningdek, Ukrainani tiklash bo‘yicha chora-tadbirlar paketini o‘z ichiga oladi. Muzlatilgan Rossiya aktivlarining 100 milliard dollari AQSH boshchiligidagi respublikani tiklash va investitsiya choralariga yo‘naltiriladi. Yevropa bu maqsadlar uchun yana 100 milliard dollar hissa qo‘shadi. Qolgan muzlatilgan Rossiya aktivlari turli sohalarda qo‘shma loyihalarni amalga oshiradigan alohida AQSH-Rossiya investitsiya vositasiga yo‘naltiriladi.
Rossiya qayta G8 ga taklif qilinadi va Rossiyaga qarshi sanksiyalarni bosqichma-bosqich bekor qilish muhokama qilinadi va kelishiladi.
Bundan tashqari, manbalarga ko‘ra, hujjatda mojaroda ishtirok etgan barcha tomonlar o‘z harakatlari uchun to‘liq amnistiya olishlari va kelajakda hech qanday da’vo arizasi bermaslik yoki shikoyatlarni ko‘rib chiqmaslik majburiyatini olishlari aytilgan.
Hujjat hali rasman e’lon qilinmagan.
