spot.uz sayti fotosurati
O‘zbekistonda tabiiy gaz uchun isitish mavsumida (noyabr-fevral) belgilangan bazaviy me'yor 15 martgacha uzaytirildi. Ushbu qaror sovuq ob-havo yaqinlashib kelayotgani sababli qabul qilindi, deb xabar beradi Energetika vazirligi matbuot xizmati.
Vazirlik ta'kidlashicha, sovuq havo massasi mamlakat hududiga kirishi ehtimoli tufayli isitish mavsumi uchun belgilangan 500 kub metr bazaviy me'yor barcha hududlarda joriy yilning 15 martiga qadar uzaytiriladi.
«15 martdan keyin esa ob-havo sharoitidan kelib chiqib, zarur bo‘lsa, qo‘shimcha choralar ko‘riladi», — deyiladi Energetika vazirligi xabarida.
O‘tgan yili ham shunga o‘xshash holat yuz bergandi, o‘shanda kuz-qish mavsumi uchun «zangori olov»ning bazaviy me'yori 1 aprelgacha uzaytirilgandi.
Isitish mavsumidan tashqari paytda bazaviy me''yor oyiga 100 kubometrgacha gazni tashkil etadi. Bunda iste'mol uchun har kubometr uchun 1000 so‘m (0,082 dollar) miqdorida tarif qo‘llaniladi. Agar xonadon 101 dan 2500 kubometrgacha iste'mol qilsa, stavka 1800 so‘m (0,15 dollar) gacha ko‘tariladi. Tizimdagi eng yuqori tarif oylik iste'moli 10 000 kubometrdan oshganda har kubometri uchun 3000 so‘m (0,25 dollar) dan to‘lanadi.
ℹ️ O‘zbekistonda energiya resurslari tariflari bir necha yildan beri oshib bormoqda. Narxning so‘nggi o‘sishi 2025 yil 1 mayda sodir bo‘ldi. Elektr energiyasining bazaviy narxi uchdan bir qismga, kilovatt-soat uchun 600 so‘m (0,049 dollar) gacha oshdi. Gaz narxi 53,8% ga oshdi va har kubometr uchun 1000 so‘m (0,082 dollar) ni tashkil etdi.
Rasmiy ma'lumotlarga ko‘ra, 2026 yildan boshlab elektr energiyasi va tabiiy gaz tariflari har yili, 1 maydan boshlab inflyatsiya darajasida, lekin 10% dan oshmagan miqdorda oshiriladi. Ilgari iste'molchilar uchun resurslar narxini muzlatish va uni kamida uch yil davomida o‘zgarishsiz qoldirish rejasi bor edi.
