RIA Novosti fotosurati
2026 yilning birinchi yarmida Rossiyada xorijiy fuqarolar tomonidan sodir etilgan ro‘yxatga olingan jinoyatlar soni 40 foizga kamaydi. Bu haqda Rossiya Ichki ishlar vazirining birinchi o‘rinbosari — IIVning fuqarolik va xorijiy fuqarolarni ro‘yxatga olish masalalari bo‘yicha xizmati rahbari Andrey Kikot Rossiya prezidenti Vladimir Putin bilan uchrashuvda ma’lum qildi, deb xabar beradi kremlin.ru.
«Agar o‘tgan yili xorijiy fuqarolar tomonidan sodir etilgan jinoyatlar sonida ozgina o‘sish kuzatilgan va bu ko‘rsatkich 41 mingtani tashkil etgan bo‘lsa, bu yil keskin pasayish kuzatilmoqda: yarim yil davomida 14,5 mingta jinoyat ro‘yxatga olindi, bu 40 foizga kam degani», — dedi Kikot.
Migratsiya xizmati rahbari bunday tendensiyani idora vakolatlarining kengaytirilishi bilan izohladi. Prezident topshirig‘iga ko‘ra, xizmatga jinoyatchilikka qarshi kurashish bo‘yicha qo‘shimcha vakolatlar, shuningdek, tezkor-qidiruv faoliyatini amalga oshirish va maxsus moddalar bo‘yicha surishtiruv o‘tkazish vakolati berilgan.
Kikot xizmat mayda va og‘ir bo‘lmagan jinoyatlarni aniqlashga emas, balki uyushgan jinoiy guruhlar, jinoiy sxemalar va uyushgan noqonuniy migratsiya kanallarini fosh etishga urg‘u berayotganini ta’kidladi. Shuningdek, mehnat migratsiyasini ro‘yxatga olish va qonuniylashtirishda foydalaniladigan hujjatlarni qalbakilashtirish bilan shug‘ullanuvchi yashirin bosmaxonalar tarmog‘ini aniqlash bo‘yicha ham amaliyot shakllangan. Natijada aniqlangan uyushgan guruhlar soni 30 foizga oshgan.
Jinoyatchilik tuzilmasi haqida gapirar ekan, Kikot an’anaviy ravishda Rossiyaga kelayotgan xorijiy fuqarolar sonidan kelib chiqib, Moskva, Moskva viloyati va Sankt-Peterburg jami jinoyatlarning qariyb yarmini tashkil etishini qayd etdi. Qolgan jinoyatlar Rossiyaning boshqa subyektlari o‘rtasida deyarli bir tekis taqsimlangan — har biriga ikki-uch foizdan to‘g‘ri keladi.
Kikotning so‘zlariga ko‘ra, migratsiya nazorati ko‘rinishidagi ma’muriy faoliyatda ham sezilarli natijalarga erishilgan. O‘tkazilgan reydlar soni 155 mingtaga oshgan. Tekshirilgan yuridik shaxslar soni ikki baravarga ko‘payib, 43 foizlik o‘sish qayd etilgan. Natijada qariyb 100 ming kishi mamlakatdan chiqarib yuborilgan, ularning 75 ming nafari majburiy tarzda deportatsiya qilingan.
Putin bu ko‘rsatkich ma’muriy tartibda 2,6 baravarga o‘sgani va 85 foizlik qo‘shimcha o‘sishni anglatishini aniqlashtirdi. Kikot bu raqamlarni tasdiqladi.
Profilaktika ishlari doirasida migratsiya xizmati bo‘linmalari qonunni buzgan 197 ming nafar xorijiy fuqaroning Rossiyaga kirishini taqiqladi. Maqomni rasmiylashtirishda taqdim etiladigan hujjatlarni tekshirish sifatini oshirish bo‘yicha ishlar kuchaytirildi. Bila turib yolg‘on ma’lumotlar ko‘rsatilgan qalbaki hujjatlarni aniqlash ko‘rsatkichi o‘n baravarga oshdi.
Nikoh-oilaviy munosabatlarning haqiqiyligini aniqlash bo‘yicha ham ishlar yo‘lga qo‘yilgan. Bu yo‘nalishda aniqlangan holatlar soni 20 foizga oshgan, bila turib yolg‘on ma’lumotlar taqdim etish holatlari esa 10 baravarga ko‘paygan. Natijada vaqtincha yashash uchun 20 mingta ruxsatnoma va yashash guvohnomasi bekor qilingan.
Kikot ushbu ishlarning barchasi politsiya organlari faoliyatiga yondashuvlar o‘zgarishi natijasida imkonli bo‘lganini ta’kidladi. Agar ilgari asosan patrul-post xizmati, yo‘l-patrul xizmati (DPS) kabi hududiy bo‘linmalardan, shuningdek, Rosgvardiya bo‘linmalarini jalb qilgan holdagi reydlardan foydalanilgan bo‘lsa, hozir ishga «transport yo‘nalishi» deb ataluvchi — asosan profilaktika ishlari bilan shug‘ullanuvchi politsiyaning transport bo‘linmalari ham jalb qilinmoqda.
Prezident topshirig‘iga ko‘ra, barcha transport uzellarida, chegara o‘tish punktlari mavjud bo‘lgan joylarda va ular yaqinida migratsiya nazorati punktlari tashkil etilmoqda. Hozirga qadar shunday 23 ta punkt tashkil etilgan. Sheremetevo aeroportida migratsiya nazorati punktini tashkil etish pilot loyiha bo‘lgan va uning faoliyati samaradorligini ko‘rsatgan.
«Biz FSB, chegara xizmati va Transport vazirligidagi hamkasblar bilan birgalikda ilgari qo‘llanilmagan yangi algoritmni ishlab chiqdik. U bizga noqonuniy migrantlarni chegara o‘tish punktlari orqali mamlakatga kirib kelayotgan paytning o‘zida to‘sish va o‘tkazmaslik imkonini beradi. Mamlakatimizdan chiqib ketayotgan qonunbuzarlarga esa qayta kirishni taqiqlaymiz», — dedi Kikot.
Uning fikricha, aynan shu profilaktik ishlar mamlakatda bo‘lib turgan xorijiy fuqarolar sonining 8 foizga kamayishi va shu bilan bir vaqtda qonuniy mehnat migrantlari sonining ortishiga olib kelgan.
Vazir o‘rinbosari, shuningdek, yangi texnologiyalar va sun’iy intellekt yordamida turli ma’lumot manbalarini birlashtiradigan tahliliy markaz tashkil etilgani haqida hisobot berdi. Ushbu manbalar qatoriga chegara o‘tish punktlari, migratsiya nazorati, yuzni tanish funksiyasiga ega videokuzatuv kameralari, ish beruvchilar va davlat organlari ma’lumotlari kiradi. Markaz ushbu ma’lumotlarni jamlaydi, noqonuniy migratsiya holatlarini aniqlaydi va unga qarshi kurashishda yordam beradi. Markaz faoliyatini 2027 yildan boshlash rejalashtirilgan.
Ichki ishlar vazirligi ma’lumotlariga ko‘ra, har yili turli maqsadlarda Rossiyaga qariyb 9 million nafar xorijiy fuqaro keladi. Bir vaqtning o‘zida mamlakat hududida 6–6,5 million nafar kishi bo‘ladi. Ularning qariyb 3 millioni mehnat migrantlari, 1,7 millioni oila a’zolari, 1 millioni esa turistlar, talabalar va shaxsiy ishlar bilan kelganlar kabi boshqa toifalarga to‘g‘ri keladi. Rossiya qonunchiligini buzgan 800 ming nafar xorijiy fuqaro nazoratdagi shaxslar reyestriga kiritilgan va ularga nisbatan qidiruv tadbirlari olib borilmoqda.
