kyrgyztest.gov.kg sayti fotosurati
Joriy yilning yanvar oyidan oktyabr oyigacha qirg‘iz tili bo‘yicha test sinovlarida 21,5 mingdan ortiq kishi qatnashgan. Biroq, imtihonni birinchi urinishda atigi 3,8 mingdan sal ko‘proq kishi muvaffaqiyatli topshira olgan. Bu sinovdan o‘tganlar umumiy sonidan taxminan 18 foizni tashkil etadi. Bu haqda «Qirg‘iztest» tashkiloti materiallariga tayanib, 24.kg nashri xabar berdi.
Nashr ochiq foydalanish uchun joylashtirilgan «Qirg‘iztest» fayllarini tahlil qilgan. Ularda qayd etilishicha, ko‘rsatilgan davrda mamlakatda 30,5 mingdan ortiq test sinovi o‘tkazilgan. Ayrim hollarda bir fuqaroning o‘zi imtihonni birinchi urinishda topshira olmagani sababli o‘z bilimini qayta tekshirgan.
Ta’kidlanishicha, sinovdan birinchi urinishda muvaffaqiyatli o‘tganlar va ikkinchi urinishda zarur ball to‘plaganlarning natijalari birgalikda hisoblansa, davlat tilini bilishini tasdiqlagan qirg‘izistonliklar ulushi test sinovlarida qatnashganlar umumiy sonidan 41 foizini tashkil etadi.
«Qirg‘iztest» tashkiloti yil boshidan buyon qariyb 13,3 ming kishining davlat tilini bilish darajasini tasdiqlaganini ma’lum qilgan. Bunda imtihon qaysi urinishda topshirilgani ahamiyatli emas. Imtihonni muvaffaqiyatli topshirganlar soni barcha test sinovlarida qatnashganlarning 43,5 foizini tashkil etadi. Nashr ta’kidlashicha, bu ko‘rsatkich 24.kg tahlili natijalariga yaqin.
Qirg‘iz tili bo‘yicha test sinovlariga jamoatchilik e’tibori respublika prezidenti lavozimiga nomzod bo‘lishni istagan Omurbek Suvanaliyev va Saymik Japikeyev tegishli imtihondan o‘ta olmaganidan so‘ng yanada kuchaydi. Ular topshiriqlarning ayrim bo‘limlari bo‘yicha yetarli ball to‘play olmagani sababli davlat rahbari saylovida ishtirok etish huquqini qo‘lga kirita olishmagan. Biroq, siyosatchilarda test sinovlarini qayta topshirish imkoniyati bor.
Shu bilan birga, Qirg‘iziston prezidentligiga nomzodlarning muvaffaqiyatsiz natijalari fonida jamoat arbobi Ilim Karipbekov imtihondagi savollar qanchalik murakkab ekanini shaxsan tekshirishga qaror qilgan. Test sinovlaridan o‘tgach, faolning fikricha, bunday imtihonni faqat qirg‘iz tilini yaxshi bilmaydigan yoki sinovdan ataylab o‘ta olmaslikni istagan kishilargina topshira olmasligi mumkin.
«Qirg‘iztest» — qirg‘iz tili bo‘yicha bilim darajasini baholashga mo‘ljallangan davlat tizimi. Imtihon besh qismdan iborat: leksika va grammatika, tinglab tushunish, o‘qish, yozish va gapirish. Bilimlar A1 (boshlang‘ich) dan C1 (yuqori) gacha bo‘lgan darajalar shkalasi bo‘yicha baholanadi. Topshiriqlarni bajarish uchun 2 soat 50 daqiqa vaqt ajratiladi.
Talab etiladigan bilim darajasi xodimlar toifasiga bog‘liq. Masalan, davlat xizmatchilari tilni B1 darajasida bilishlari kerak, 2027 yildan esa ularga B2 darajasi talab qilinadi. Etnik ozchilik vakillari bo‘lgan Qirg‘iziston fuqarolari uchun hozircha A2 darajasi yetarli, ammo 2028 yildan bu talab B1 darajasiga ko‘tariladi.
