«Istiqlol» futbolchilari. «Istiqlol» FK fotosurati
Markaziy Osiyodan musobaqada ishtirok etayotgan uchta jamoadan OFK Chaqiruv ligasi guruh bosqichining ikkinchi turida faqat Dushanbening «Istiqlol» jamoasi g‘alaba qozondi. Tojikistonning yana bir klubi «Regar-TadAZ» Quvaytning «Al-Qodsiya» jamoasiga minimal hisobda mag‘lub bo‘ldi, Turkmanistonning «Axal» klubi esa Suriyaning «Al-Ittihod Ahli» jamoasidan yirik hisobda yengildi.
20 oktyabr kuni «Istiqlol» Hisordagi Markaziy stadionda Quvaytning «Al-Arabiy» klubini 2:0 hisobida mag‘lub etdi. 39-daqiqada Rustam Soirov hisobni ochdi, 85-daqiqada esa zaxiradan maydonga tushgan Alisher Shukurov gol urdi. Tojikiston chempioni uchun bu joriy musobaqadagi ilk ochkolar bo‘ldi: birinchi turda Vitaliy Levchenko boshchiligidagi jamoa Livanning «Nejme» klubiga 0:1 hisobida yutqazgan edi.
Ikki turdan keyin «Istiqlol» va «Nejme» uch ochkodan jamg‘ardi. V guruhida Suriyaning «Homs Al-Fidaa» klubi olti ochko bilan peshqadamlik qilmoqda. U ikki uchrashuvda ham g‘alaba qozongan.
23 oktyabr kuni bo‘lib o‘tadigan so‘nggi turda «Istiqlol» aynan Suriya jamoasi bilan o‘ynaydi. Kamida ikki gol farqi bilan g‘alaba qozonish dushanbeliklarga «Nejme» — «Al-Arabiy» uchrashuvi natijasidan qat’i nazar, guruhda birinchi o‘rinni kafolatlaydi. Agar Livan klubi o‘z o‘yinida g‘alaba qozonmasa, «Istiqlol» uchun «Homs Al-Fidaa» ustidan har qanday hisobdagi g‘alaba yetarli bo‘ladi. Ochkolar teng bo‘lgan taqdirda, OFK birinchi navbatda da’vogar jamoalarning o‘zaro uchrashuvlari natijalarini hisobga oladi.
S guruhida ishtirok etayotgan «Regar-TadAZ» Quvaytda mezbonlarning «Al-Qodsiya» klubiga 0:1 hisobida mag‘lub bo‘ldi. Yagona golni Nasser Ar-Ravahi birinchi bo‘limga qo‘shib berilgan vaqtda urdi. Birinchi turda Tursunzoda jamoasi Hindistonning «Goa» klubini 2:1 hisobida mag‘lub etgan edi. Shu bois ikki uchrashuvdan keyin uning hisobida uch ochko bor. «Goa» ham shuncha ochko to‘plagan, «Al-Qodsiya» esa olti ochko bilan guruhda peshqadamlik qilmoqda.
So‘nggi turda «Regar-TadAZ» oldingi ikki uchrashuvda ham mag‘lub bo‘lgan Bangladeshning «Fortis» klubiga qarshi maydonga tushadi. Tojikiston jamoasi guruhda birinchi o‘rin uchun kurashish yoki ikkinchi o‘rinni egallab keyingi bosqichga chiqish imkoniyatini saqlab qolmoqda.
Markaziy Osiyo vakillari orasida ikkinchi tur eng omadsiz jamoa «Axal» bo‘ldi. Turkmaniston klubi Butan poytaxti Timpxuda Suriyaning «Al-Ittihod Ahli» jamoasiga 1:5 hisobida mag‘lub bo‘ldi. Birinchi bo‘limdan keyin suriyaliklar 1:0 hisobida oldinda edi, tanaffusdan so‘ng esa yana to‘rtta gol urishdi. «Axal»ning yagona golini 88-daqiqada Enver Annayev kiritdi.
Birinchi turda «Axal» Butanning «Paro» klubi bilan 2:2 hisobida durang o‘ynagan edi. O‘shanda turkmanistonliklar ikki gol farqi bilan oldinda borayotgan bo‘lsa-da, 90-daqiqada ikkinchi golni o‘tkazib yuborishgandi. Ikki uchrashuvdan keyin «Axal»ning hisobida bir ochko bor. A guruhida olti ochko bilan Livanning «Al-Ansar» klubi yetakchilik qilmoqda. Turkmaniston jamoasi 23 oktyabr kuni aynan shu klub bilan kuch sinashadi.
Qayd etish joiz, OFK Chempionlar ligasi-2 musobaqasida Turkmanistonning yana bir klubi — «Arkadag», shuningdek, O‘zbekistonning «Nasaf» jamoasi ishtirok etmoqda. Bundan tashqari, O‘zbekistonning «Neftchi» va «Paxtakor» klublari elita Chempionlar ligasida qatnashmoqda. Qirg‘iziston klublari esa Chaqiruv ligasi saralash bosqichidan o‘ta olmadi.
