wikimedia.org sayti fotosurati
O‘zbekiston prezidenti Shavkat Mirziyoyev Qashqadaryo viloyatiga tashrifi doirasida umumiy qiymati 6 milliard dollardan ortiq bo‘lgan 161 ta loyihani ishga tushirdi. Davlat rahbari matbuot xizmatining xabar berishicha, 69 ta loyiha foydalanishga topshirilgan, yana 92 ta obyekt qurilishi boshlangan.
Bugun respublikaning ushbu hududida ishga tushirilayotgan 28 ta sanoat korxonasida qariyb 7 mingta doimiy ish o‘rni yaratilmoqda. Jumladan, Italiyaning Cotonella brendi bu yerda yiliga 8,5 million dona tayyor trikotaj mahsulotlari ishlab chiqaradi. Kasbi, Mirishkor va Koson tumanlarida to‘qimachilik sohasida yana 14 ta loyihani amalga oshirish boshlandi. Bu loyihalar natijasida 18 ming nafar mahalliy aholi ish bilan ta’minlanadi.
Qishloq xo‘jaligi ham rivojlanmoqda. Masalan, O‘zbekiston va AQSHning Wosune Food Ingredients Karshi qo‘shma korxonasi 3,5 ming gektar maydonda yetishtirilgan 100 ming tonna meva-sabzavot mahsulotlarini qayta ishlashni rejalashtirmoqda. Eksport salohiyati 40 million dollarga baholanmoqda. Bunda Qashqadaryodan Nestle va Purina kabi mashhur savdo brendlari uchun mahsulotlar yetkazib berish ko‘zda tutilgan.
Bundan tashqari, Misr va Pokiston investorlari Nishon va G‘uzor tumanlarida 24 ming gektar yerni o‘zlashtirish loyihasini amalga oshirishga kirishmoqda. Loyiha doirasida kartoshkachilik va chorvachilikni rivojlantirish rejalashtirilgan.
Prezident ta’kidlashicha, «yashil» iqtisodiyot hudud taraqqiyotining mustahkam asosiga aylanishi kerak. Bu borada bir qator loyihalar amalga oshirilmoqda. Oqsuv daryosida umumiy quvvati 24 megavatt bo‘lgan uchta gidroelektr stansiyasi foydalanishga topshirildi. Qarshi tumanida xitoylik hamkorlar bilan birgalikda qiymati 150 million dollar bo‘lgan chiqindilardan elektr energiyasi ishlab chiqarish zavodini joriy yil oxirigacha ishga tushirish rejalashtirilgan. Kitob, Yakkabog‘ va Shahrisabz tumanlarida umumiy quvvati 58 megavatt bo‘lgan to‘qqizta kichik GES quriladi.
Shuningdek, Kitob tumanida oltin qazib olish loyihasi ishga tushirildi. Bu yerda O‘zbekistonning hamkorlari Ozarbayjon tadbirkorlaridir.
Shahrisabz tumanida esa rossiyalik investorlar bilan 300 million dollarlik dor yo‘li, mehmonxona va tog‘-chang‘i kurorti majmuasini tashkil etish ko‘zda tutilgan.
Hudud iqtisodiyoti haqida gapirarkan, Mirziyoyev 2027 yil Qashqadaryoni zamonaviy sanoat va agrotexnologiyalar asosida rivojlantirish yili bo‘lishini ta’kidladi.
Yangi loyihalarni ishga tushirish marosimida prezident so‘nggi besh yil davomida viloyatga 20 trillion so‘m (taxminan 1,7 milliard dollar) yo‘naltirilgani va 7 milliard dollar xorijiy investitsiya jalb qilinganini qayd etdi. Hududda xomashyoni chuqur qayta ishlashga ixtisoslashgan minglab korxonalar ish boshladi, aholi jon boshiga to‘g‘ri keladigan daromad esa uch baravar oshdi.
«Endi yetishtirilgan mahsulotni viloyatning o‘zida chuqur qayta ishlab, voha aholisining munosib daromad topishiga sharoit yaratish kerak», — deya xulosa qildi Mirziyoyev.
Davlat rahbari matbuot xizmatining qo‘shimcha qilishicha, Qashqadaryoga tashrif davomida prezident erkin iqtisodiy zonadagi to‘qimachilik klasteri fabrikasi, Nasaf brendi ostida qishloq xo‘jaligi texnikasini yig‘ishga ixtisoslashgan O‘zbekiston — Xitoy qo‘shma korxonasi, shuningdek, meva-sabzavot mahsulotlarini qayta ishlashga ixtisoslashgan korxona faoliyati bilan ham tanishdi.
