Jahon chempionati oldidan Eronga ajratilgan muxlislar chiptalari kvotasi mezbon davlatlardan biri — AQSh bosimi ostida bekor qilindi. Bu haqda Tasnim xabar berdi.
FIFA qoidalariga ko'ra, milliy terma jamoalar federatsiyalari har bir o'yin uchun stadion sig'imining 8 foizini o'z muxlislari o'rtasida taqsimlash uchun oladilar. Tegishli kvotani olgan Eron futbol federatsiyasi (EFF) milliy terma jamoaning Yangi Zelandiya, Belgiya va Misrga qarshi o'yinlari uchun chiptalarni o'zining rasmiy sayti orqali sotishni boshlagan. Biroq, Jahon chempionati boshlanishidan uch kun oldin federatsiya chiptalarni sotish imkoniyatidan mahrum bo'lgan.
EFF kvotaning bekor qilinishini qoralab, muxlislarni chipta sotib olish huquqidan mahrum qilish xalqaro musobaqalar ruhiga va ishtirokchi davlatlar o'rtasidagi tenglik tamoyiliga zid ekanini ta'kidladi.
«Bunday qadam dunyodagi eng yirik futbol turnirini tashkil etishda sportga aloqador bo'lmagan va siyosiy mulohazalar roli haqida jiddiy savollarni tug'diradi», — deyiladi PressTV saytida e'lon qilingan EFF bayonotida.
Federatsiya FIFA va 2026 yilgi Jahon chempionati tashkilotchilarini «xolislik, adolat va belgilangan qoidalarga rioya qilishga va siyosiy motivatsiyaga asoslangan tashabbuslar dunyodagi eng yirik futbol tadbiriga soya solishiga yo'l qo'ymaslikka» chaqirdi.
AQSh va Isroil Eronga qarshi raketa hujumlarini boshlaganidan so'ng, Eron terma jamoasining Jahon chempionatidagi ishtiroki shubha ostida qolgandi. EFF iltimosiga binoan, Eron terma jamoasining bazaviy lageri jamoaning AQShdagi ishtirokini minimallashtirish uchun Arizonadan Meksikaga ko'chirildi. Shu bilan birga, Eron terma jamoasining uchta o'yini Qo'shma Shtatlarda bo'lib o'tadi: birinchisi 16 iyun kuni Los-Anjelesda Yangi Zelandiyaga qarshi, keyin 21 iyun kuni Belgiyaga qarshi, so'ng 27 iyun kuni Sietlda Misrga qarshi o'yin bo'lib o'tishi rejalashtirilgan.
Eron delegatsiyasi birinchi o'yindan atigi o'n kun oldin viza ololdi va uning ba'zi xodimlari, jumladan, EFF rahbari Mehdi Tajga Qo'shma Shtatlarga kirishga ruxsat berilmagan. Avvalroq, Davlat kotibi Marko Rubio AQSh Eronga Islom inqilobi qo'riqchilari korpusi (IIQK) bilan bog'liq shaxslarni Jahon chempionati delegatsiyasiga kiritishga ruxsat bermasligini aytgan edi.
Jahon chempionati 11 iyunda boshlanadi va uchta mamlakatda — AQSh, Kanada va Meksikada bo'lib o'tadi. Reuters ta'kidlashicha, bu 1930 yili tashkil etilganidan beri mezbon mamlakat o'zi bilan urush holatida bo'lgan davlatni qabul qilishi kerak bo'lgan birinchi Jahon chempionati hisoblanadi.
