Amerika orzusi

Tramp davrida AQSHda o‘zbekistonliklar qanday yashayotgani, migratsiya reydlari, deportatsiyalar va viza berishdagi cheklovlar haqida
Pensilvaniyada ICE ishi Foto: Zach Scherer / Fox News AI tomonidan ishlov berilgan

2025 yilning yanvaridan 2026 yilning martiga qadar AQSHdan ming nafardan ortiq Oʻzbekiston fuqarosi deportatsiya qilindi. «Fargʻona» AQSHdagi oʻzbekistonliklar va u yerga borishni hali ham umid qilayotganlar qanday qiyinchiliklarga duch kelayotganini aniqlash maqsadida Amerika matbuoti, sud qarorlari hamda davlat idoralari hujjatlarini oʻrganib chiqdi.

2026 yil 9 fevral kuni Oʻzbekiston fuqarosi Amir Roganov Manxettendagi federal binoga migratsiya xizmati vakillari bilan majburiy uchrashuvga keldi. U Nyu-Yorkda qariyb ikki yil yashab, boshpana berish toʻgʻrisidagi arizasi boʻyicha qarorni kutayotgan va migratsiya organlarida muntazam roʻyxatdan oʻtib turgan edi. Bu safar u uyiga qaytolmadi: AQSH Immigratsiya va bojxona politsiyasi (ICE) xodimlari uni uchrashuvning oʻzidayoq qoʻlga olishdi.

Roganov Amerika chegarasini 2024 yilning fevralida kesib oʻtgan va chegarachilar tomonidan ushlangan edi. Hujjatlar rasmiylashtirilganidan soʻng, u belgilangan shartlarga rioya qilish majburiyati bilan migratsiya ishi koʻrib chiqilguniga qadar ozodlikka chiqarilgan. U Bruklinda istiqomat qilgan va belgilangan uchrashuvlarga kelib turgan. Navbatdagi kelish dastlab Nyu-Jersi shtatida, soʻngra Bruklindagi federal hibsxonada saqlash bilan yakunlandi.

Advokatlar hokimiyat organlari Roganovni tegishli sud tekshiruvisiz erkinlikdan mahrum qilganini bildirib, sudga murojaat qilishdi. 10 mart kuni federal судья Enn Donnelli uning konstitutsiyaviy huquqlari buzilganini tan oldi va erkakni bir sutka ichida ozod etish haqida farmoyish berdi. Shuningdek, sud bunday choraga zarurat borligi masalasi oldindan koʻrib chiqilmasdan turib, uni takroran hibsga olishni taqiqladi.

Bu qaror hibsga olishning qonuniyligiga taalluqli boʻlib, Roganovga Amerikada bir umrga qolish huquqini bermasdi. Uning boshpana soʻrab bergan arizasi koʻrib chiqilishda davom etmoqda edi.

Donald Tramp Oq uyga qaytganidan soʻng, Amerika maʼmuriyati migratsiya nazoratini kuchaytirdi va qoʻlga olish amaliyotini kengaytirdi. Oʻzbekistonliklar ushbu oʻzgarishlarga, xususan, koʻplab oʻzbek haydovchilari va kichik kompaniya egalari mehnat qilayotgan yuk tashish sohasida toʻqnash keldilar.

Bruklin, yuk mashinalari va migratsiya politsiyasi

Pew Research Center hisob-kitoblariga koʻra, 2023 yilda AQSHda kelib chiqishi oʻzbek ekanini koʻrsatgan qariyb 55 ming kishi yashagan. Ushbu baholash aralash qonga ega boʻlgan insonlarni ham oʻz ichiga oladi va faqat Oʻzbekiston fuqarolari bilangina cheklanmaydi. 25 mingga yaqin kishi boshqa etnik yoki irqiy mansublikni koʻrsatmasdan, oʻzlarini faqat oʻzbek deb atagan.

Ayniqsa, janubiy Bruklinda oʻzbekistonliklarning borligi yaqqol seziladi. Bu yerda milliy taomlar restoranlari, oziq-ovqat doʻkonlari, qurilish va transport korxonalari faoliyat yuritmoqda.

2026 yil avgust oyida Brooklyn Magazine jurnali koʻp yillar Samarqandda oshpaz boʻlib ishlagan va 2015 yilda Nyu-Yorkka koʻchib oʻtgan Murod Narziqulov haqida yozdi. U avvaliga turli tasodifiy ishlar bilan kun kechirgan, soʻngra oʻziga tanish kasbga qaytgan.

Yurtdoshi Sanat Borozov bilan birga Narziqulov «Shashlik № 1» restoranini ochadi. Birinchi maskan 2023 yilda Bruklinning Greyvsend va Bensonxerst tumanlari chegarasida paydo boʻladi, keyinroq hamkorlar ikkinchisini ham ochishadi.

Brooklyn Magazine jurnalisti restoranni ulkan stollar atrofida davralar toʻplanadigan va asosiy eʼtibor taomga qaratiladigan maskan sifatida taʼriflaydi. Bu yerda shashlikdan tashqari palov, somsa va manti ham tayyorlanadi. Narziqulov oshxonaga javob beradi, Borozov esa biznesni tashkil etish va ilgari surish bilan shugʻullanadi.

Restoranlardan birining boshqaruvchisi Nyu-Yorkning boshqa tumanlarida bu muvaffaqiyatni takrorlash oson kechmasligini tan oldi. Bino topish mumkin, biroq choʻgʻda oʻzbekcha shashlik pishirishni biladigan oshpazlarni topish ancha murakkab.

Oʻzbekistonliklar orasida keng tarqalgan yana bir kasb — yuk mashinasi haydovchiligi (dalnoboyshik). Baʼzilar yollanma haydovchilikdan boshlab, keyinchalik yuk mashinalari sotib oladi va oʻz firmalarini ochadi. Biroq aynan yoʻllarda va haydovchilik hujjatlarini beruvchi muassasalar yaqinida migrantlar ICE tekshiruvlariga duch kelmoqdalar.

Haydovchi Ulugʻbek. Davir Trucking YouTube kanalidagi videodan lavha

3 aprel kuni mahkama xodimlari Pensilvaniya shtatining Gʻarbiy Kittanning shahridagi haydovchilik guvohnomalarini berish markazi yaqinida reyd oʻtkazadi. 13 kishi, jumladan Oʻzbekiston, Qirgʻiziston va Turkmanistondan kelganlar hibsga olinadi. AQSH Ichki xavfsizlik vazirligi ularning barchasi mamlakatda qonuniy ruxsatsiz boʻlib turganini bildirgan.

Voqea guvohlari CBS Pittsburgh telekanaliga oʻsha kuni muassasa oldida katta navbat yuzaga kelganini, avtoturarjoy esa yuk mashinalari bilan toʻlib ketganini aytib berishdi. Mahalliy fuqaro Geri Klingersmit migratsiya politsiyasini chaqirishga shaxsan oʻzi harakat qilganini maʼlum qildi: ingliz tilida gaplashmayotgan chet elliklar va ayrim kabinalardagi odamlar soni unda shubha uygʻotgan.

Boshqa bir guvoh Rayan Mur esa hech qanday shubhali holatni sezmagan. Uning soʻzlariga koʻra, odamlar federal agentlar paydo boʻlgunga qadar qoʻllarida hujjatlar bilan kirish joyida turishgan.

Qoʻlga olish vaqtida ayrimlar qochishga, shu jumladan yaqindagi oʻrmon orqali yashirinishga uringan. Migratsiya rasmiylari qoʻlga olinganlardan biri qarshilik koʻrsatib, mahalliy politsiyachiga hujum qilganini bildirdi. Pensilvaniya transport boshqarmasi reydni tashkil etishda ishtirok etmaganini maʼlum qildi. Hibsga olinganlar orasida nechta Oʻzbekiston fuqarosi boʻlganiga hukumat aniqlik kiritmagan.

Stop AAPI Hate huquq himoyasi tashkiloti ICE-ning 2025 yil 20 yanvardan 2026 yil 6 avgustgacha boʻlgan davrga oid maʼlumotlarini tahlil qilgan. Uning hisob-kitoblariga koʻra, Osiyo davlatlaridan kelgan shaxslarning hibsga olinishi avvalgi maʼmuriyatning shunga oʻxshash davriga nisbatan 436% ga, deportatsiyalar soni esa 1103% ga oshgan. Bu koʻrsatkichlar tadqiq etilgan butun guruhga tegishlidir. Tashkilot nazoratning kuchaytirilishi ayniqsa sezilarli taʼsir koʻrsatgan fuqaroliklar qatorida Oʻzbekiston, Qirgʻiziston va Qozogʻistonni qayd etgan.

Tadqiqot maʼlumotlariga koʻra, Oklaxoma shtatida AQSHdagi fuqaroligi boʻlmagan oʻzbekistonliklarning atigi 0,4 foizi istiqomat qiladi, biroq ushbu guruhga nisbatan ICE tomonidan amalga oshirilgan hibslarning 10,1 foizi aynan shu shtat hissasiga toʻgʻri kelgan. Mualliflar bu farqni boshqa mintaqalardan kelgan yuk mashinalari haydovchilari Oklaxoma orqali oʻtadigan yirik avtomagistrallar hamda yoʻl politsiyasi va migratsiya xizmatlarining birgalikdagi amaliyotlari bilan bogʻlamoqdalar.

Tadqiqotda foydalanilgan AQSH aholisini 2020–2024 yillarda oʻrganish maʼlumotlariga muvofiq, AQSHda ishlayotgan fuqaroligi boʻlmagan oʻzbekistonliklarning qariyb 17 foizi yuk tashish yoki unga turdosh haydovchilik kasblari bilan shugʻullanadi.

Amerika maʼmuriyati nazoratning kuchaytirilishini xavfsizlik talablari bilan izohlamoqda. Tekshiruvlar, boshqa jihatlar qatorida, xorijliklarga tijorat haydovchilik guvohnomalarini berish va ularning ingliz tilini bilishi masalalariga ham taalluqlidir. Huquq himoyachilari kelib chiqishi va muloqot tili boʻyicha kamsitishlardan xavotirda. Shu bilan birga, haqiqiy haydovchilik guvohnomasining mavjudligi ICE tomonidan eʼtirozlar boʻlmasligiga kafolat bermaydi: yuk mashinasini boshqarish huquqi va immigratsiya maqomi alohida-alohida tartibga solinadi.

Noyabr oyi boshida federal sud yana bir oʻzbek yuk mashinasi haydovchisi — Gʻayratjon Toʻxtamurodovning ishini koʻrib chiqdi. U AQSHga 2021 yil 1 oktyabrda kelgan, koʻp oʻtmay Arizonada chegarachilar tomonidan qoʻlga olingan va mamlakatdan chiqarib yuborish jarayoniga duchor boʻlgan edi. Immigratsiya sudi uni 8 ming dollarlik garov evaziga ozod qilishga ruxsat bergan. 2022 yil yanvar oyida Toʻxtamurodov boshpana soʻrab ariza topshirgan.

Ish koʻrib chiqilayotgan bir paytda erkak AQSHda yashab, yuk mashinasi haydovchisi boʻlib ishlagan. 2026 yil 27 oktyabrda Pensilvaniya shtatining Bristol shahridagi 13-trassa yaqinida transport vositalarini tekshirish vaqtida uni ICE xodimlari toʻxtatgan. Uning tijorat haydovchilik guvohnomasida koʻrsatilgan Filadelfiyadagi manzil avvalgi migratsiya hujjatlaridagi Nyu-York manzili bilan toʻgʻri kelmagan. Agentlar voqea joyida maʼmuriy order rasmiylashtirib, haydovchini hibsga olishgan.

3 noyabr kuni federal судья Sintiya Rufe hibsga olishni Toʻxtamurodovning konstitutsiyaviy huquqlarini buzish deb tan oldi. U erkak ishlab kelganini, ilgari ozodlikka chiqarish shartlariga rioya qilganini va sudga maʼlum boʻlgan jinoiy oʻtmishga ega emasligini qayd etdi. Rasmiy organlar uning xavf tugʻdirgani yoki yashirinish niyatida boʻlganini isbotlay olmadilar.

Sudya haydovchini zudlik bilan ozod qilish toʻgʻrisida farmoyish berаdi va tegishli tartib-taomillarsiz uni qayta hibsga olishni taqiqlaydi. Boshpana masalasi esa ochiqligicha qoladi.

Markaziy Osiyodan chiqqanlar Tramp qaytishidan ancha avval ham Meksika orqali AQSHga kirishga harakat qilib kelgan. Ayrimlar chegarani kesib oʻtgan zahoti ushlangan boʻlsa, boshqalar boshpana soʻrab murojaat qilgan va qarorni Amerikada kutish imkoniyatiga ega boʻlgan. Bunday safarlar atrofida qiymati minglab dollarni tashkil etadigan vositachilik xizmatlari bozori shakllangan.

Jinoiy ishlardan birida Amerika prokuraturasi Bruklinda istiqomat qilgan ikki nafar Oʻzbekiston fuqarosiga — 39 yoshli Akmal Rasulov va 52 yoshli Iskandar Shukurovga ayblov eʼlon qildi. Rasulov grin-kartaga ega boʻlgan, Shukurov esa, tergov maʼlumotlariga koʻra, AQSHda qonuniy ruxsatsiz yashab kelgan.

Ayblov talqiniga koʻra, 2021 yildan 2025 yilga qadar ular jinoiy sheriklari bilan birgalikda migrantlarga, asosan Oʻzbekiston fuqarolariga Amerika chegarasiga yetib olish va mamlakatga noqonuniy kirishda koʻmaklashgan. Olingan pulning bir qismi Meksikadagi sherikka yuborilgan. Oʻtkazmalarning maqsadini yashirish uchun ayrim toʻlovlar qarzlarni qaytarish yoki yuridik xizmatlar haqi sifatida rasmiylashtirilgan.

Erkaklarga xorijliklarni noqonuniy olib kirishni tashkil etish va jinoiy daromadlarni legallashtirish ayblovlari qoʻyilgan. Shukurov hibsda qoldirilgan, Rasulov garov evaziga ozodlikka chiqarilgan. Ularning aybdorligini sud belgilab berishi kerak.

Boshqa bir tarix Shuhratjon Muhitdinovning ishi boʻyicha sud materiallarida aks etgan. 2023 yil aprel oyida u Kaliforniyadagi Kaleksiko yaqinida chegarani kesib oʻtgan. Chegarachilar tomonidan ushlanganidan soʻng, u migratsiya ishi yakunlanguniga qadar ozod qilingan.

Muhitdinov Bruklinda joylashib, boshpana soʻrab murojaat qilgan va ishlash uchun ruxsatnoma olgan. Dastlab uy koʻchirish ishlari bilan shugʻullangan, keyin tijorat haydovchisi boʻlgan.

Sudda erkak kenja farzandida onkologik kasallik aniqlanganini soʻzlab bergan. Uning soʻzlariga koʻra, u davolanish uchun qarz olgan, biroq uni oʻz vaqtida qaytara olmagan. Muhitdinov qarz bergan shaxs oʻziga va yaqinlariga tahdid qila boshlaganini, soʻngra doʻkonlardan oʻgʻirlik qilishga majburlaganini taʼkidlagan. Bu holatlar daʼvogarning oʻz soʻzlari asosida bayon etilgan.

2025 yil oktyabr oyida Muhitdinovga oʻgʻirlik boʻyicha ayblov eʼlon qilingan. Politsiya mahkamasidan ozod qilinganidan soʻng, uni ICE xodimlari qoʻlga olgan. 2026 yil sentyabriga kelib u migratsiya hibsxonasida 11 oydan ortiq vaqt oʻtkazgan. Bu davr ichida immigratsiya sudi unga boshpana berishni rad etgan, ammo erkak qaror ustidan shikoyat qilgan.

Advokatlar hibsning davomiyligini vaj qilib koʻrsatib, uni ozod etishga harakat qilishgan. Federal sud avval oʻtkazilgan garov boʻyicha eshituvni va keyingi tekshiruvlardan boʻyin tovlash xavfi baholanganini inobatga olib, iltimosnomani rad etgan.

AQSH maʼmuriyati Oʻzbekiston fuqarolarini muntazam ravishda charter reyslari orqali vataniga joʻnatmoqda. 2026 yil 21 yanvar oqshomida Toshkentga 44 nafar deportatsiya qilingan shaxs yetib kelgan. Omni Air International samolyoti Texasdagi El-Pasodan havoga koʻtarilib, Portsmut, Buxarest va Yerevanda toʻxtab oʻtgan. Parvoz bir kecha-kunduzdan ortiq davom etgan.

11 mart kuni Toshkentga yana 65 nafar deportatsiya qilingan Oʻzbekiston fuqarosi olib kelingan. «Dunyo» agentligi bir nechta yoʻlovchi bilan suhbatlashgan. Ulardan biri Amerikaga pul ishlash maqsadida borganini, biroq jiddiy muammolarga duch kelib, uch yarim oyni migratsiya hibsxonasida oʻtkazganini soʻzlab bergan. U vatandoshlariga xorijdan faqat qonuniy yoʻllar bilan ish qidirishni maslahat bergan.

Deportatsiya qilingan oʻzbekistonliklar. Dunyo fotosi

May oyida AQSHdan yana 26 nafar, iyun oyida esa 24 nafar Oʻzbekiston fuqarosi qaytarildi. Bu reyslar barcha deportatsiya holatlarini qamrab olmaydi.

Davlat departamenti Bosh inspektori boshqarmasining noyabr oyidagi hisobotida 2025 yilning yanvaridan 2026 yilning martiga qadar ming nafardan ortiq deportatsiya qilinganlarning qaytishiga koʻmaklashish Amerikaning Toshkentdagi elchixonasi ishining natijalaridan biri sifatida qayd etilgan. Hujjatda oylik taqsimot berilmagan, shu bois aynan 2026 yilning oʻzida chiqarib yuborilganlar sonini undan aniqlab boʻlmaydi.

Oʻzbekiston AQSHdan boshqa davlatlarning fuqarolarini ham qabul qilmoqda. Third Country Deportation Watch huquq himoyasi loyihasi maʼlumotlariga koʻra, 2026 yil mart oyida Amerika maʼmuriyati respublikaga olti kishini, jumladan ikki nafar Rossiya va bir nafar Armaniston fuqarosini yuborgan.

Rossiyaliklardan biri avvalroq siyosiy taʼqib xavfi sababli Amerika sudidan vataniga majburiy qaytarishdan himoya olgan boʻlgan. Toshkentga kelganidan soʻng u koʻp oʻtmay uchinchi davlatga ketgan.

Migrantlarni oʻzlari fuqarosi boʻlmagan davlatlarga yuborish amaliyotidan Tramp maʼmuriyati, xususan, kelib chiqish mamlakatiga toʻgʻridan-toʻgʻri qaytarish qiyinlashgan hollarda foydalanmoqda. Huquq faollari bunday amaliyotda deportatsiya qilinganlar zarur huquqiy himoyasiz qolib ketishi mumkinligidan xavotirdalar.

Oʻyinlarsiz Amerika orzusi

Koʻplab Oʻzbekiston aholisi uchun grin-karta lotereyasi uzoq vaqt davomida AQSHga qonuniy koʻchib oʻtishning asosiy yoʻllaridan biri boʻlib qolgan edi. Diversity Visa dasturi AQSHga immigrantlari nisbatan kam boʻlgan davlatlardan kelgan fuqarolarga ish beruvchining yoki yaqin qarindoshlarning taklifisiz doimiy yashash huquqiga daʼvogarlik qilish imkoniyatini beradi.

Davlat departamenti statistikasiga koʻra, DV-2026 oʻyinida Oʻzbekistondan 3754 nafar potensial immigratsion viza oluvchisi, jumladan gʻoliblar va ularning oila aʼzolari tanlab olingan.

Tanlab olinish viza olishni kafolatlamaydi. Arizachilar dastur talablariga muvofiqligini tasdiqlashlari, suhbat va tekshiruvlardan oʻtishlari zarur. Bundan tashqari, rasmiylashtirish muddatlar va mavjud vizalar soni bilan cheklangan.

2025 yil dekabr oyida Amerika maʼmuriyati Diversity Visa boʻyicha vizalar berishni vaqtincha toʻxtatdi. Braun universitetidagi otishma va Massachusets texnologiya instituti oʻqituvchisining oʻldirilishi bunga sabab boʻldi. Tramp maʼmuriyati gumonlanuvchi avvalroq AQSHga aynan lotereya orqali koʻchib kelganini koʻrsatib, potensial immigrantlarni tekshirishni qayta koʻrib chiqish zarurligini bildirdi.

Qaror ustidan sudga shikoyat qilindi. 2026 yil avgust oyida avvalgi toʻxtatib turish sud qaroridan soʻng oʻz kuchini yoʻqotdi, biroq Davlat departamenti deyarli darhol yangi cheklovni joriy etdi.

31 avgustdagi tushuntirish xatida mahkama gʻoliblar hujjat topshirishlari va suhbatlarga kelishlari mumkinligini, ammo ularga viza berilmasligini maʼlum qildi. Hech qanday istisnolar nazarda tutilmagan edi.

DV-2026 ishtirokchilari uchun bu oʻyin natijalari boʻyicha koʻchib ketish imkoniyatini butunlay yoʻqotish xavfini anglatar edi: vizalar berishning odatiy muddati 2026 yil 30 sentyabrda tugardi.

Keyingi oʻyin bilan bogʻliq noaniqlik ham yuzaga keldi. Davlat departamenti DV-2027 uchun roʻyxatdan oʻtish muddatlarini eʼlon qilmadi. Avgust oyida Red Eagle Law yuridik firmasi hokimiyat zimmasiga arizalarni qabul qilishni boshlash majburiyatini yuklash talabi bilan sudga murojaat qildi. 14 oktyabr kuni federal sud uning talablarini qoʻllab-quvvatladi, ammo hukumat qaror ustidan shikoyat keltirdi. 29 oktyabrda Toʻqqizinchi okrug apellyatsiya sudi uning ijrosini toʻxtatib qoʻydi.

DV Lottery ishtiroki uchun anketa toʻldirish ofisi. Yandeks fotosi

Apellyatsiya instansiyasi yuridik firmaning bunday daʼvo qoʻzgʻatish huquqiga eʼtibor qaratgan: sudyalar kompaniya oʻz nomidan sudga murojaat qilish uchun yetarli asoslarni isbotlay olmadi deb hisoblashgan. Shu bilan birga, ular Davlat departamentining roʻyxatga olishni boshlashdan bosh tortganini maʼqullamasliklarini alohida taʼkidlab oʻtishgan.

Diversity Visa toʻgʻrisidagi qonun bekor qilinmagan, biroq 2026 yil 17 noyabr holatiga koʻra DV-2027 uchun arizalar qabuli baribir boshlanmagan.

Cheklovlar qarindoshlari oldiga koʻchib borishni rejalashtirganlarga ham daxl qildi. 2026 yil 21 yanvardan boshlab Davlat departamenti 75 ta davlat, jumladan Oʻzbekiston fuqarolariga immigratsion vizalar berishni vaqtincha toʻxtatdi. Ushbu chora ta’siri ostida doimiy immigratsiyaning asosiy toifalari, jumladan AQSHdagi qarindoshlari oldiga ko‘chib o‘tmoqchi bo‘lgan er-xotinlar, ota-onalar va farzandlar qolgan.

Hukumat bu qarorni yangi keluvchilarning moliyaviy mustaqilligini tekshirish va ularning davlat nafaqalariga qaram boʻlib qolish ehtimolini kamaytirish zarurati bilan izohladi.

Hujjatlarni qabul qilish davom ettirildi, belgilangan suhbatlar bekor qilinmadi, ammo alohida istisnolardan tashqari, immigratsion vizalar berish toʻxtatib qoʻyildi. Bu chora sayyohlik vizalariga bevosita daxl qilmadi, avval berilgan vizalar bekor qilinmadi.

Sud muhokamasidan soʻng, 21 avgust kuni Davlat departamenti yanvar oyidagi toʻxtatish amalini bekor qildi. Oʻsha vaqtga kelib u yetti oy davom etgan edi.

Oʻzgarishlar mehnat immigratsiyasiga ham taʼsir koʻrsatdi. Sentyabr oyida Tramp maʼmuriyati H-1B dasturi boʻyicha xorijiy mutaxassislarni rasmiylashtirishning muayyan holatlarida 100 ming dollarlik toʻlov talab qilinishi muddatini uzaytirdi. Bu dastur Amerika ish beruvchilari tomonidan taklif etiladigan ixtisoslashtirilgan kasb egalari boʻlgan xodimlarga moʻljallangan.

Talab biznesning eʼtirozlariga va sud daʼvolariga sabab boʻldi. Reuters xabariga koʻra, oktyabr oyi boshiga kelib ikki federal судья yigʻimni undirishni bloklab qoʻygan. Yuk mashinalari haydovchilari va restoran xodimlarining aksariyati uchun H-1B ilgari ham koʻchib oʻtishning imkonli yoʻli hisoblanmas edi: dasturda ishtirok etish uchun faqat ish taklifining oʻzi yetarli emas.

Shavkat Umarov. Foto: DC News Now / Nexstar

Grin-karta lotereyasidan foydalanishga ulgurganlar uchun esa koʻchib oʻtish baʼzida shaxsiy biznesni boshlash debochasiga aylandi. 2026 yil may oyida DC News Now telekanali Merilend shtatining Frederik shahrida yashovchi Shavkat Umarov haqida hikoya qildi. Oʻn yil avval u grin-karta yutib olib, turmush oʻrtogʻi va kichik qizi bilan Oʻzbekistondan koʻchib kelgan edi.

Umarov ingliz tilini deyarli bilmasdi, oilaning katta jamgʻarmasi ham yoʻq edi. U ish qidirib doʻkonlar va supermarketlarni kezib chiqqan, qattiq mehnat qilishga vaʼda bergan va unga imkoniyat berishlarini soʻragan. Oxir-oqibat uni tungi smenada peshtaxtalarga mahsulotlarni terib chiqish ishiga olishgan.

Pul turar joy ijarasiga arang yetar, baʼzida oila hatto oziq-ovqatni ham tejashga majbur boʻlardi. Umarov yaxshiroq haq toʻlanadigan ish topadi — yuk mashinasida non tashiya boshlaydi. Supermarket rahbarlari uni maoshini oshirish orqali olib qolmoqchi boʻlishadi, lekin u ketishga qaror qiladi.

Asta-sekin Umarov oʻz yuk mashinasi uchun pul toʻplaydi va transport kompaniyasini ochadi. Ikki yildan keyin ikkinchi, soʻngra uchinchi mashinasini sotib oladi. Bir vaqtning oʻzida mahalliy kollejda ingliz tilini oʻrganadi va Asian American Center markaziga yordam soʻrab murojaat qiladi.

Tashkilot rahbari Elizabet Chang uning deyarli pulsiz, ikkita chamadon bilan kelganini eslaydi. Oradan oʻn yil oʻtib, Umarov transport biznesini boshqarib, jurnalistga tungi smenalar va dastlabki ish qidirgan kezlari haqida soʻzlab beradi.

«Bu yerga kelganimda, menda atigi ikkita chamadon bor edi. Amerika orzusi — haqiqat. Oʻn yil oldin bizda hech vaqo yoʻq edi», — deydi u.

  • Nima uchun Rossiyadagi data — markazlaridagi muammolar Qozog‘istondagi odatiy servislar faoliyatini izdan chiqarib yubordi va respublika bu vaziyatdan foydalana oladimi?

  • 111 ta ekologik tashkilot Jahon bankidan nimani talab qilmoqda va buning Tojikistonga qanday aloqasi borligi haqida

  • 1916 yilgi qo‘zg‘olondan Ukrainadagi urushga qadar

  • O‘nlab qozog‘istonliklar Rossiyaga ishlash uchun ketishgan, ammo u yerda urushga jalb etilgan