sputniknews.uz sayti fotosurati
Toshkentdagi sud O‘zbekiston Davlat xavfsizlik xizmati (DXX)ning sobiq ofitserlari va Tashqi mehnat migratsiyasi agentligi (TMМA) rahbarining sobiq o‘rinbosarini uzoq muddatlarga — 16 yilgacha ozodlikdan mahrum qilish jazosiga hukm qildi. Ayblanuvchilarga vatandoshlarni Janubiy Koreyaga ishlash uchun yuborish jarayonida korrupsiya sxemasini tashkil qilganlik aybi qo‘yilgan, deb xabar beradi «Azattik Aziya».
Sud hukmiga ko‘ra, DXX ichki xavfsizlik boshqarmasining sobiq boshlig‘i, polkovnik Alijon Ashurov 16 yilga ozodlikdan mahrum qilingan. G‘anchar Uzoqov va Timur Shariksiyevning har biri 15,5 yillik qamoq jazosiga hukm qilingan. TMМA rahbarining sobiq birinchi o‘rinbosari Suxrob Sayfutdinov esa 15 yilga ozodlikdan mahrum qilingan.
Ushbu ish bo‘yicha sud jarayoni yopiq tarzda o‘tkazilgan, chunki tergov materiallarida fuqarolarning shaxsiy ma’lumotlari va qonunchilikka ko‘ra ommaviy ravishda oshkor qilinishi taqiqlangan boshqa ma’lumotlar mavjud bo‘lgan.
Migratsiya sohasidagi mojaro haqida respublika Bosh prokuraturasi 2026 yil may oyida ma’lumot bergan edi. Nazorat mahkamasi ma’lumotlariga ko‘ra, profil idora xodimlarini ham o‘z ichiga olgan firibgarlar guruhi aniqlangan bo‘lib, ular o‘zbekistonliklarni Seulga yuborish jarayonida korrupsiya sxemasini yo‘lga qo‘ygan. Tergov versiyasiga ko‘ra, qonunbuzarlar xizmat mavqeidan foydalanib, xorijga ishlash uchun ketishni istagan fuqarolardan rasmiy to‘lovlardan tashqari 7–12 ming dollardan mablag‘ undirgan. Biroq, yakunda migrantlar hech qayerga keta olmagan. Shu tariqa yuzlab odamlar aldov qurboni bo‘lgan, firibgarlar tomonidan olingan mablag‘larning umumiy miqdori qariyb 90 million dollarga baholangan.
Joriy yil iyul oyi oxirida Koreyaga mehnat migrantlarini yuborish jarayonida korrupsiya jinoyatlarini sodir etganlikda gumonlanayotgan to‘rt kishi Jinoyat kodeksining 210-moddasi 3-qismi «a» va «b» bandlari («Pora olish»), 243-moddasi («Jinoiy faoliyatdan olingan daromadlarni legallashtirish») hamda 301-moddasi 1-qismi («Hokimiyatni suiiste’mol qilish, mansab vakolatlaridan chetga chiqish yoki hokimiyat harakatsizligi») bo‘yicha ayblanayotgani xabar qilingandi.
Mazkur ish va Tashqi mehnat migratsiyasi agentligi xodimlari bilan bog‘liq boshqa bir qator mojarolar fonida joriy yil sentyabr oyi boshida O‘zbekiston prezidenti Shavkat Mirziyoyev agentlik direktori Behzod Musayevni lavozimidan ozod qildi.
